Sabotsy, faha 07 Jona 2025

(Sal 138. 1-8 / Hira 36: 3 / Vavaka / Mofonaina / Vavaka / Hira 432: 1)

Jeremia 32. 16-25

Ny mofonainantsika dia vavaka nataon’i Jeremia rehefa avy nankato ny baikon’ Andriamanitra ny hividianany ny tanin’ny rahalahin-drainy izy. Azontsika takarina avy amin’io vavaka io fa:

1. Tsitoha Andriamanitra (and 17, 18)

<< Indrisy, Jehovah Tompo ô! Indro, Hianao no nanao ny lanitra sy ny tany tamin’ny herinao lehibe sy ny sandrinao ahinjitra, ary tsy misy zava-mahagaga izay tsy hainao. » hoy ny fivavak’i Jeremia. Azontsika tarafina avy amin’izany fa tena miaiky ny maha Tsitoha an’Andriamanitra ny mpaminany: amin’ny toerana rehetra, mahay ny zavatra rehetra ary mahalala ny zavatra rehetra ka mahatonga Azy naniraka an’i Jeremia hividy ny tanin’ny rahalahin-drainy ho enti-mananatra ny vahoakany mikiry biby amin’ny fahotana.

2. Mamonjy Andriamanitra (and 19-22)

<< Ary nitondra ny Isiraely olonao nivoaka avy tany amin’ny tany Egypta… » hoy i Jeremia, mamerina mampahatsiaro ny fomba nanavotan’Andriamanitra ny Isiraely tamin’ny fanandevozana tany Egypta. Asehony miharihary fa tena mamonjy ny olona mibaboka sy mitaraina Andriamanitra (Eks 3. 7), ka anehoany ny heriny sy ny fitiavany ny famonjena. Efa nomena anao Jesoa hamonjy (Jao 3. 16). Ho anao indrindra izany! Mba tsapanao ve ?

3. Mikapoka Andriamanitra (and 23-25)

<<Ary tonga teto izy, dia nandova azy, nefa tsy nihaino ny feonao izy…ka dia nataonao mihatra aminy izao loza rehetra izao. ». Misongadina eto kosa, fa rehefa niala nenina Andriamanitra kanefa tsy henoina sady tsy ankatoavina dia mikapoka sy manafay, ary dia tonga ny fahababoana. Nahoana moa no dia manamafy hatoka sy minia tsy mankato e? Hiandry kapoka mahamay ve vao hibebaka?

Fanontaniana:

Inona no mahatonga ny olona ho be faniasia?

Sampana Sekoly Alahady Foibe