Alarobia 28 Aogositra 2024

Jaona 17.6-19

Jesoa Kristy, tia ny mpianany

1- Mivavaka ho an’ny mpianany i Jesoa Kristy

Manatanteraka ny fanaovam-beloma ny mpianany i Jesoa satria fanao mihitsy izany ho an’ny mpitarika ny vondrona iray rehefa handao io vondrona io izy noho ny antony misy. Mety raha mivavaka ho an’ny zanany na ho an’ny vondrona hilaozany izy mba hampahery azy fa tsy sanatria misara-maina fotsiny. Nanao izany i Mosesy rehefa handao ny olona ka nivavaka sy nitsodarano azy ireo (Deo 32). Jesoa Kristy koa eto dia nanatanteraka izany satria hisaraka amin’ny mpianatra Izy. Ka dia nampahery ny mpianatra izy, ary koa:

2- Mangataka ny hiarovana ny mpianatra Izy

Voalohany, nangataka Izy ny hiarovana azy ireo amin’ny alalan’ny herin’ny Ray ary tsy fiarovana ara-bakiteny anefa no nangatahany, toy ny hoe fiarovana amin’ny fahavalo ohatra, fa ny fiarovana ny fiombonany kosa (and 11). Azony antoka mantsy fa hisy hamely ny mpiandry dia hihahaka ny ondry (Zak 13. 7), tiany hiombona hatrany mantsy ny mpianany.

Ankoatra izany, mivavaka ho an’ny mpianatra koa Izy satria rehefa misaraka Aminy ny mpianatra dia tsy maintsy hiaina sy hivelona eto amin’izao tontolo izao ihany, kanefa io tontolo io dia mankahala azy ireo; araka ny efa nambarany fa ho halan’izao tontolo izao ireto mpianatra ireto (15. 1719); ho tandindomin’ny fankahalan’izao tontolo izao sy ny famelezan’ny devoly; hampiharihary ny halehiben’ny haratsiam-panahiny izao tontolo izao (and 14 15). Mivavaka koa Izy mba hahamasina ny mpianatra izany hoe ho voatokana ho an’Andriamanitra ka na inona na inona manjo azy dia efa an’Andriamanitra mandrakariva izy ireo.

Fanontaniana:

Mety ve ny mivavaka ho an’ny hafa? Mino ve ianao fa mivavaka ho an’izay mino Azy i Jesoa?

Sampana Sekoly Alahady Foibe