Alatsinainy 03 Mey 2021

LIOKA 2.22-32

Jesoa irery no mitondra famonjena

Tonga ny fotoana izay hitondrana an’i Jesoa zaza hatolotra ho an’ny Tompo araka ny lalàna. Niakatra ho any Jerosalema i Maria sy Josefa mba hanatanteraka izany niaraka tamin’ny fanatitra.

1-Ny Fanahy Masina no mitondra mankeo amin’i Jesoa

Rehefa tonga tao Jerosalema izy ireo dia nahita azy ny lehilahy nantsoina hoe : Simeona . Io lehilahy io dia voalaza fa olo-marina sady mpivavaka tsara (and 25) . Ny Fanahy Masina izay nitoetra tao amin’i Simeona dia efa nanambara taminy sy efa nampanantena azy fa tsy ho faty izy raha tsy mahita ilay Mesia avy amin’ny Tompo ( and 26) .Ary ny Fanahy Masina ihany koa no hitondra azy hiditra ao an-kianjan’ny Tempoly mba hahitany an’i Jesoa (and 27) . Araka izany dia manana anjara toerana lehibe amin’ny fomba ahitana an’i Jesoa ny asan’ny Fanahy Masina . Izany no mahatonga antsika hangataka mandrakariva ny fitarihan’ny Fanahy Masina amin’ny zavatra rehetra izay hatao , indrindra amin’ny famakiana ny Tenin’Andriamanitra mba hahatakarantsika izay tena sitrapon’Andriamanitra ka hihaonana amin’i Jesoa Kristy .

2-Ho an’ny firenena rehetra ny famonjen’i Jesoa

 » Dia fahazavana hahazava ny firenena sady voninahitry ny Israely olonao » (and 32) . Ny fahatongavan’ny Mpamonjy dia fahasoavana lehibe ho an’ny olona rehetra, na Jentilisa na Jiosy . « Fahazavana » ho an’ny Jentilisa, satria nitoetra tao amin’ny aizim-pito mihitsy izy ireo , ka ny fahatongavan’i Jesoa no hampahazava azy , »Voninahitra ara-panahy » ho an’ny Jiosy , Voninahitra izay very teo aloha noho ny fandavany an’Andriamanitra , nefa ho azony indray amin’izao fahatongavan’ny Mesia izao raha manaiky Azy ireo . Tsy ho diso anjara amin’ny famonjeny isika !

Fanontaniana :

Ahoana no ahatsapana fa mitarika antsika ny Fanahy Masina ?

Sampana Sekoly Alahady FOIBE FJKM