Talata 12 Janoary 2021

2 PETERA 1.1-11

Ireo toe-panahy tokony hasehon’ny kristiana

1. Fahatsaram-panahy :
   Hatsaram-panahy no ambara amin’ny hoe : fahatanjahan-tsaina . Ilaina ny herimpo ho enti-manao sy mandavorary izay rehetra atao . Ny olona toy izany dia ho azon’ny firenena hianteherana .
2. Fahalalana
   Ny olona manana fahalalana araka an’ Andriamanitra dia izay olona matotra amin’ny fandraisana fanapahankevitra . Mahalala ny tokony hatao sy ny tsy tokony hatao amin’ny asa iandraiketany.
3. Fifehezan-tena
   Izany no ambaran’ny teny hoe : « fahononam-po » . Ny olona mahafehy tena dia izay olona itoeran’ny Fanahy Masina ka mankato an’i Kristy amin’izay rehetra ataony sy alehany .
4. Faharetana
   Ny olona manana faharetana dia izay mahabanjina ny fiainana mandrakizay ka mahafikitra amin’i Kristy manoloana ny zava-tsarotra lalovana . Ny herimpo sy ny fanantenana no manosika azy .
5. Fitiavam-bavaka
   Entina ilazana olona tia mifandray amin’Andriamanitra sady manam-pitiavana olona .
6. Fitiavana ny rahalahy
   Ny fifankatiavan’ny mpirahalahy no tiana ambara eto , dia ilay fifanohanana sy fifanampiana eo amin’ny ankohonana. Tokony ho hita miavaka ao amin’ny samy kristiana izany toetra izany.
7. Fitiavana ny olona rehetra
   Ity kosa dia manambara ilay fitiavan’Andriamanitra tsy misy fepetra . Ny zava-dehibe amin’izany dia ny fikatsahana izay tsara indrindra ho an’izay tiavina ka tonga hatramin’ny fahafoizan-tena tahaka izay nasehon’ Andriamanitra hananantsika fiainana.

Fanontaniana :

Iza amin’ireo toetra ireo no tsy mbola anananao ?

Sampana Sekoly Alahady FOIBE FJKM