Talata 13 Oktobra 2020.
GENESISY 22.1-14
Andriamanitra mizaha toetra ny olona
1-Mamantatra ny fahatokiany Azy
« hitako izao fa matahotra an’ Andriamanitra hianao ka tsy narovanao tamiko ny zanakao, dia ny lahitokanao » (and12b).
Nangatahin’Andriamanitra hatao fanatitra ho Azy Isaka ,zanak’i Abrahama. Natoky an’Andriamanitra i Abrahama ka nanaiky izany hatramin’ny farany : nifoha maraina ,niainga , nanorina alitara , namatotra an’Isaka , naninjitra ny tànany … Ireo fihetsika rehetra nataon’i Abrahama ireo no nahatonga an’ Andriamanitra ho resy lahatra tamin’ny fahatokian’i Abrahama Azy . Rehefa asehon’ny olona amin’ny fihetsika sy ny ataony rehetra ny baikon’Andriamanitra taminy , dia ho resy lahatra Andriamanitra fa matahotra Azy izany olona izany . Koa tanteraho amin’ny fahatokiana Azy ny baikon’Andriamanitra , na dia mafy aza izany , dia ho resy lahatra amin’ny fahatokianao Azy Izy .
2-Manitsy ny fomba fiainana ny finoana
« Aza maninjitra ny tànanao amin’ny zazalahy , ary aza maninona azy akory hianao » (and12a) .
Fanao teo amin’ny firenena Fenisiana , Moabita , Amonita ny « fanatitra olona » tamin’izany . Mandefa ny zanany mamaky ny afo no filazan’ny Soratra Masina azy matetika , izay nandraran’ Andriamanitra mafy ny Israely . Izao fandrarana tsy hamoniana an’Isaka izao dia midika fa Andriamanitra manafoana ny fanatitra olona ary mankasitraka ny fanatitra avy ao anatin’ny olona , dia ny fahatokiana Azy izany . Ka ny fanoloran-janaka dia fampanekena sy fanokanana azy hatoky an’Andriamanitra mandritry ny androny rehetra . Koa atolory sy atokany ho an’Andriamanitra , hanana finoana an’i Jesoa Kristy ny zanakao fa ankasitrahana eo anatrehan’ny Tompo izany .
Fanontaniana :
Inona no tokony hatao rehefa tojo fizahantoetra mahamay?
Sampana Sekoly Alahady FOIBE FJKM