Alakamisy 09 Jolay 2020.
1 PETERA 2.13-17
« Manaja ny olona rehetra. Tiava ny rahalahy . Matahora an’Andriamanitra . Manajà ny Mpanjaka » (1 Pet 2.17)
Mampianatra ny kristiana izay sady olom-pirenena i Petera .Ambarany fa olona afaka ny kristiana ka ny ho fiainany dia :
1-Fiainana feno fanajana (and17a,e)
Ny mpino eto dia taomina eto ho feno fanajana , ary ny olona rehetra tsy ankanavaka arakaraka ny toerana sy ny sokajiny avy eo amin’ny fiaraha-monina . Tsy ny manam-bola ihany , na izay manana toerana ambony ihany fa « ny olona rehetra » .Ao anatin’izany koa ny mpitondra , na izay heverina ho ratsy fanahy aza dia tokony hajaina (Rom 13.1) . Tamin’ny andron’i Petera mantsy dia i Néron no amperora izay tena nampahory ny kristiana no nitondra . Na i Jesoa aza tamin’ny androny , ohatra , dia nandoa hetra koa mba ho fanajana ny mpitondra (Mat 22.21)
2-Fiainana feno fitiavana (and17b)
Matoateny mitaky asa no ampiasain’i Petera eto. Tsy miandry hotiavina vao mitia fa mitia tsy misy fepetra na takalony . Ny kristiana dia mpitia tsy mila tambiny , ary manahaka an’iKristy isika amin’izany , ny Azy rahateo tsy manahaka an’iKristy isika amin’izany . Ny Azy rahateo , tsy teny fotsiny ny hoe : mitia fa nasehony tamin’ny nahafoizany ny ainy ho famonjena izao tontolo izao na dia tsy mendrika hotiavina aza izao tontolo izao .
3-Fiainana feno tahotra an’ Andriamanitra (and17b)
Ny tahotra ambara teo dia tsy ny tahotra , miteraka horohoro fa tahotra midika fitiavana sy fanajana no heviny , ary ny fitiavana an’ Andriamanitra no loharanon’io tahotra io .Ny hoe : « matahotra an’Andriamanitra » izany eto dia tsy hoe : mihorohoro na mivarahontsana amin’Andriamanitra , fa tia Azy ka manaja Azy ary matahotra ny hampalahelo Azy amin’ny zavatra atao rehetra .
Fanontaniana :
Efa fiainan’ny olona afaka tokoa ve ny iainanao?
Sampana Sekoly Alahady FOIBE FJKM