Alarobia 08 Jolay 2020.
JAONA 9.30-38
Mitantara amintsika ny amin’ilay lehilahy teraka jamba ny Mofonaina anio.
1-Izay mino an’iJesoa : jamba fa tonga mahiratra
Hatrany an-kibo dia efa jamba ity lehilahy voatantara eto ity . Teo amin’ny Jiosy dia noheverina fa ny fahotana no mahatonga ny trangan-javatra toy izany , ka na ilay jamba no mpanota na ny ray aman-dreniny .Miova anefa izany rehefa miditra an-tsehatra i Jesoa . Marihana eto fa i Jesoa no nahita ity jamba ity fa tsy ilay jamba no tonga nanatona azy .Maneho izany fa i Jesoa mihitsy no tompo-marika amin’ny famonjena sy fanafahana ny olona . Notantarain’ity lehilahy ity avokoa ny nataon’iJesoa taminy rehefa nanontany azy ny olona . Ary na dia noroahan’ny Fariseo izy , dia i Jesoa koa no tonga nanatona sy nampahery azy . Ianao koa ,aza misalasala mitantara ny fomba nanafahan’iJesoa anao mba hitaomana ny hafa hino .
2-Izay tsy mety mino : mahiratra ihany fa jamba
Eo anatrehan’izany anefa , dia misy andian’olona minia mikimpy sady tsy mino no tsy mety manaiky ny maha-Mesia an’i Jesoa , na dia famantarana lehibe aza no efa nataony . Eto dia voalaza fa » hatrizay hatrizay dia mbola tsy nisy re fa efa nampahiratra ny mason’izay teraka jamba » . Ny dikan’izany dia hoe : Andriamanitra irery ihany no mahavita izany . Ireo andian’olona izay mihevitra fa sady mahay Soratra Masina no minia tsy hahita , fa efa ny Mesia io miasa io . Ny manevateva ilay lehilahy nino indray no nataony . Mihiratra ao anatin’ny aizina ireto Fariseo ireto ka tsy misy na nona na inona hitany . Aza mba jamba tahaka ireo Fariseo ireo.
Fanontaniana :
Raha mandinika ny tenanao ianao , iza amin’ireo no mitovy aminao ?
Sampana Sekoly Alahady FOIBE FJKM