Talata 07 Jolay 2020.
MARKA 3.13-19
Ny niantsoan’iJesoa ny mpianany 12 lahy no tantarain’ity perikopa ity . Galiliana avokoa izy 12 lahy , na dia misy manana anarana Grika aza toa an’i Filipo sy Andrea .
1-Ny toerana nifidianan’i Jesoa azy ireo (and13)
« Teo an-tendrombohitra » no niantsoan’iJesoa ireto mpianany ireto , maneho ny tena hasarobidin’ny fiantsoana azy . Midika fa tsy zava-poana na kisendrasendra ny fiantsoana .Raha ny Filazantsara araka an’i Marka dia teny amoron-dranimasina hatrany no nihaonan’iJesoa amin’ny olona sy hampianarany azy ireo . Fa rehefa hanao zava-dehibe ihany , na hivavaka lavitra ny olona Izy vao miakatra any an-tendrombohitra . Ho antsika izay nantsoin’iJesoa hanambara ny fanafahana avy aminy , hitoriteny sy hamoaka demonia , tsarovy fa tsy zava-maivana io fiantsoana io .
2-Ny isan’izy ireo (and16-19)
« Roa amin’ny folo ahy » no voalaza fa isan’ireo mpianatra nofidin’iJesoa . Galiliana avokoa izy ireo araka ny efa voambara teo aloha, izany hoe : tsy olona ambony , tsy mpanan-karena , tsy tapi-pahaizana . Fa ny isa 12 koa dia manana heviny manokana , mampahatsiahy ny fokom-pirenan’Israely 12 , ny isan’ny Mpitsara 12 …Araka izany raha 12 lahy no nantsoin ‘i Jesoa dia tiany haseho fa te-hamonjy ny vahoakan’ Andriamanitra , tsy ankanavaka Izy . Izany koa no manazava ny hoe : rehefa namono tena i Jodasy dia nosoloina mba ho feno 12 ihany ny isan’ny mpianatra . Mpitondra famonjena ho an’ny olona rehetra mihitsy ny olona nantsoin ‘i Jesoa ka tokony hanefa izany iraka izany araka ny tanjon’iJesoa , fa efa nobaikony rahateo hoe : « Mitoria ny Filazantsara amin’ny olombelona rehetra « .
Fanontaniana :
Inona no ataonao hitandrovana tsara ny antsonao?
Sampana Sekoly Alahady FOIBE FJKM