Alakamisy 02 Jolay 2020.
ROMANA 6.20-23
Ato amin’ny Rom 6.dia manoro làlana ny mpino i Paoly ny amin’ny fomba ho enti-miady sy mandresy ny fahotana.Eto amin’ny and 20-23 dia mampahatsiaro i Paoly fa efa tsy andevon’ny ota intsony izay ao amin’i Kristy . Noho izany :
1-Tandremo sao miverina ho andevon’ny ota indray (and20)
« Fa fony mpanompon’ny ota ianareo... » hoy i Paoly .Izany hoe : zavatra efa laa no lazainy , ny lsan’ireo kristiana tao Roma raha mbola tsy nandray ny Filazantsara ka nilona tamin’ny fiainana adala sy niliba tamin’ny fahotana , nandeha araka ny sitrapony satria nanana fahafahana baranahiny , ary tsy an’Andriamanitra fa nihevitra ho tompon’ny tenany sy afaka nanao izay tiany rehetra .Fa rehefa nandray an’i Kristy kosa dia niova Tompo , tsy ny sitrapon’ny ota intsony no mibaiko fa efa Jesoa Tompo .Mitaona antsika mba hitandrina izany ka hihazona ny maha- an’i Kristy , mba tsy hiverin-dàlana ho mpanompo na andevon’ny ota intsony fa efa nafahan’i Kristy noho ny fahasoavany.
2-Aoka hiaina amin’ny fahamasinana hatrany (and22)
« …dia manana ny vokatrareo ho amin’ny fahamasinana , ary farany dia fiainana mandrakizay« , hoy ny filazan’i Paoly azy raha milaza kosa ny ankehitrin’ny Fiangonana tao Roma. Asongadiny amin’izany fa tena asan’Andriamanitra ny nanafaka azy ireo ka nahatonga azy ireo ho mpanompon’ Andriamanitra , ary tokony hifanaraka amin’izany ny fiainany , ho fiainana feno fahamasinana, ho fiainana voatokana ho an’ Andriamanitra , fiainana tsy te-hiherika fahotana intsony , ho rikorikom-pahotana mihitsy .Mitaky fiambenana izany mba tsy handrorona hihosim-potaka indray (2 Pet 2.22) .Ampianarin’i Jesoa an’izany rahateo isika tahaka ilay lehilahy efa nositraniny (Jao 5.14)
Fanontaniana:
Inona àry ny tokony hatao mba tsy hianjerana amin’ny fahotana indray?
Sampana Sekoly Alahady FOIBE FJKM