« Koa aza menatra ny ho vavolombelon’ny Tompontsika ry Lehilahy mahery…….”
( 2Timoty 1 : 8a ; Mpits. 6: 12b)
“Ankatoavy ny Fitarihan’ny Fanahy Masina”
Fandaharana Iombonana
Alahady 10 Mey 2020
-MAMPIASA NY FANOMEZAM-PAHASOAVANA,
-LEHIBE AMIN’NY FINOANA
-MITOMBO AO AMIN’I KRISTY.
( Efes 4 : 11 – 16 )
“ Be hery ny lehilahy Hendry, eny mitombo hery ny olona manam-pahalalana”
HAFATRA
“Koa aza menatra ny ho vavolombelon’ny Tompontsika ry lehilahy mahery”(II Tim. 1, 8a; Mpits. 6, 12b )
Ry lehilahy, malalan’Andriamanitra sady voantso no masina; ho aminareo anie ny fahasoavana sy ny fiadanana avy amin’Andriamanitra Raintsika sy Jesoa Kristy Tompo. Amena Izany tenin’ny Apostoly Paoly izany no iarahabana antsika malalan’Andriamanitra izay nantsoiny niala tao amin’ny maizina ho amin’ny Fahazavany mahagaga noho ny fahatrarantsika indray ity Alahady izay natokana hitrotroana ambavaka ny Sampana Lehilahy Kristiana Ity. Isaorana ny Tompo Jesoa fa tontosa soaman-tsara tamin’iny taona lasa iny fanavaozana ireo tompon’andraikitra eo anivon’ny sampana sy sampanasa ary asa eto anivon’ny FJKM, iray amin’ireny isika Sampana Lehilahy Kristiana. Ny teny filamatra tany amin’ny zaikabe izay hanompanantsika indray ny asa ao anatin’izao taom-piasana 2019-2023 izao dia ny hoe : “Lehilahy Kristiana : Mampiasa ny fanomezam-pahasoavana, Lehibe amin’ny Finoana , Mitombo ao amin’i Kristy.” Efes. 4,11-16
Mandritra ny taom-piasana 2019-2023, ny Birao ny Sampana Lehilahy Kristiana Foibe dia manao laharam-pahamehana ny Fanatsarana ny fitantanana rehetra (ara-bola, ara-pitaovana, maha olona) mba ho modely eo amin’ny ambaratongan-drafitry ny SLK, araka ny Fahamarinana, satria “Jesoa Kristy no Lalana sy Fahamarinana ary Fiainana…..” Jaona 14, 6 sy ny hoe: “Tsy misy fifaliana mihoatra noho izao aho, dia ny andrenesako fa mandeha araka ny Fahamarinana ny zanako” III Jaona 1, 4. Koa hiezaka isika rehetra mba ho modely alaintahaka eo amin’ny lafiny rehetra. Misaotra an’Andriamanitra amin’ny fahavitan’ny asa “IVONTOERANA S.L.K. F.J.K.M.” any Foulpointe /SP 31 Toamasina Vavahadin’ny Filazantsara sy antsika rehetra nitrotro am-bavaka ary indrindra ny fitondram-panjakana ankehitriny amin’ny alalan’ny tetikasa CCPREAS tamin’ny nanekeny, ny fangatahina nanohy sy namita ny ivotoerana. “Fa Andriamanitra tsy mba tsy marina hanadino ny asanareo sy ny fitiavana izay nasehonareo ho voninahitry ny anarany.” Heb. 6, 10. Miandry ny fitokanana ny trano isika,raha sitrapon’ny Tompo Jesoa Kristy, ary manentana antsika LEHILAHY KRISTIANA F.J.K.M amin’ny fampitaovana ny ivotoerana.Maneho ny fisaorana ny SLK SP 37 koa isika amin’ny fiaraha-miasa ho fampitomboana ny machine fanaovana ny mofompandraisana, izay efa antitra tokoa. Miandry ny fahatongavan’ny machine Mofo mpandraisana vaovao nafarana isika ankehitriny.Misaotra ary manentana hatrany antsika amin’ny fandrotsahana ny rakitra atao amin’izao fotoana hitrotroana am-bavaka ny SLK Foibe izao, izay naraikitra amin’ity fandaharana Iombonana ity ny nandrotsaka izanynanomboka ny volana Martsa 2019 ka hatramin’ny volana Martsa 2020. Raha misy ny mety ho latsaka na tsy voasoratra dia iangaviana am-pitiavana mba hanatona ny Foibe FJKM varavarana 501 na hiantso ny laharana 0342088311 (Tonia). Farany, ny Tompo Jesoa Kristy dia mila S.L.K. : SAHY mitory ny FAHAMARINANA, LIANA amin’ny Soratra Masina, manana KETRIKA (paikady) mahomby eo amin’ny asa fitoriana ny filazantsara ary MANKATO NY FITARIHAN’NY FANAHY MASINA. Ho an’Andriamanitra irery anie ny Voninahitra.
Antananarivo, faha 27 Martsa 2020
Ny Filoha
RAKOTOHERISOA Benjamin Désiré
Ny Tonia
RAMIANDRANIRINA Nahitantsoa Avotra,
Mpitandrina HAFATRY NY ZAIKABE FAHA VII
« Koa aza menatra ny ho vavolombelon’ny Tompontsika, ry lehilahy mahery” (2 Tim. 1:8; Mpits. 6, 12b) Ry Havana, “Ho aminareo anie ny Fahasoavana sy ny Fiadanana avy amin’Andriamanitra Raintsika sy Jesoa Kristy Tompo.” Misaotra an’Andriamanitra lehibe isika fa tanteraka soa aman-tsara ny ZAIKABE FAHA VII ny Sampana Lehilahy Kristiana ny 10-11 OKTOBRA 2019, izay notanterahina teto amin’ny Synodamparitany Atsimo Atsinanana FJKM Manakara Fiderana.
Isaorana ny Mpiandraikitra foibe Mpiahy ny SLK Atoa RAKOTOMANDIMBINDRAINIBE Mamisoa sy ireo Mpiandraikitra Foibe tonga nanatrika izao ZAIKABE izao.
Ankasitrahana ny Tonian’ny Departemantan’ny Fiangonana Atoa RAKOTONINDRAINY Jaona Mpitandrina nitondra ny tenin’Andriamanitra sy nitarika tamin’ireo fanavaozana rehetra.
Ireto ny fehin-kevi-dehibe tsara ho fantatra avy amin’izany:
Ny teny faneva ho banjinina amin’izao taom-piasana ho avy izao dia: “Miorena tsara aza miova ry lehilahy mahery” IKor 15: 58a; Mpits. 6:12 a
Ny toerana hanatanterahana ny fihaonambe 2021 : Fort Dauphin SP 07
Toerana hanatanterahana ny fihaonambe sy zaikabe 2023: Vatomandry SP 32 Farany, mampahery sy mirary soa ho antsika rehetra, indrindra fa ny SLK manerana ny tany eo amin’ny fitoriana ny filazantsara sy fijoroana ho vavolombelon’ny Tompo Jesoa lohan’ny Fiangonana sy ny lehilahy rehetra. Aoka ho tsapa sy hisongadina eo amin’ny teny, asa fitondrantena isika SLK. “Miorena tsara aza miova ry lehilahy mahery” IKor 15: 58a ; Mpits. 6:12 a Ho voninahitry ny Tompo Ray, Zanaka ary Fanahy Masina. Ho laza tsara ny fiangonana FJKM ho hery sy tanjaka ary reharehan’ny Sampana Lehilahy Kristiana. Ho fahasoavana ho an’ny rehetra sy izao tontolo izao. “Ho aminareo rehetra izay ao amin’ny Kristy anie ny fiadanana”(I Pet 5:14b)
Indreto ary ny anaran’ny Tonia sy ny Birao hiara-hiasa mandritra ny taompiasana 2019 – 2023 Ny Tonia: RAMIANDRANIRINA Nahitantsoa Avotra, Mpitandrina Ny Filoha: RAKOTOHERISOA Benjamin Désiré SP 19 Ny Filoha Mpanampy: RANDRIAMAMPITA Tovomanjato N., Mpitandrina SP 19 Mpitantsoratry ny PV: RAMANATSALAMA Lovasoa Hasina Mpitandrina SPAA 12 Mpitahiry vola: RANDRIANOMENJANAHARY Mamy Gaston SP 11 Mpitantsoratry ny vola: RAKOTONIAINA Tianasoa Désire SP 38 Mpanolontsaina: TOTOFENO Théis Elia Mpitandrina (FJKM Vatomandry SP 32) RAKOTONDRAZAKA Volatantely SP 01 Mpandinimbola: RANDRIANARIVONY Marka Daniela SPAA 10 RANARIJAONA Jean Jacques Mpitandrina SP 13 ANDRIAMIHAJASOLOMALALA SPAA 1 Manakara, 11 Oktobra 2019
Ny Filohan’ny Zaikabe
RAKOTOHERISOA Benjamin Désiré
Ny Filohan’ny SLK Foibe
RAKOTOZAFY Solofoniaina ,Mpitandrina
……………………………………………………………………………………..
FANDAHARANA IOMBONANA
“Ankatoavy ny Fitarihan’ny Fanahy Masina”
HIRA: Mijoro ny lehilahy
Fiarahabana Apostolika
Fisaorana sy fiderana Sal. 30, 1-5 Hira 14
Vavaka fiderana
Fanambarana sy Sitrapon’Andriamanitra Gal. 5, 13. 16 « sambatra ny mahitsy lalana ….. » Hira 437 1
Fiaiken-keloka 449 4, 6
Famelan-keloka atolotr’Andriamanitra Isa. 54, 7-8 ; Rom. 5, 8 « Sambatra ny olona izay voavela ny helony….. »
Fanambarana ny finoan’ny Fiangonana Fanekem-pinoana laharana faha II
Vavaka mangina « Amin’ny Anaran’ny Ray sy ny Zanaka ary ny Fanahy Masina. Amen. »
TORITENY
LIOKA 12:8-12
Lohahevitra: “ANKATOAVY NY FITARIHAN’NY FANAHY MASINA.” “Ho an’izay rehetra, S.L.K, malalan’Andriamanitra sady voaantso no masina; Ho aminareo anie ny fahasoavana sy ny fiadanana avy amin’Andriamanitra Raintsika sy Jesoa Kristy Tompo.” (Rom. 1, 7) Ny Soratra Masina izay andraisantsika ny hafatry ny Tompo Jesoa amin’izao alahadin’ny S.L.K FJKM 2020 izao ,sady iainantsika ny lohahevitry ny volana Mey manao hoe “ANKATOAVY NY FITARIHAN’NY FANAHY MASINA”dia ny Filazantsaran’ny Tantaram-pamonjena na ny Filazantsara araka an’i Lioka dia ny LIO. 12, 8-12. Eto amin’Ity Perikopa ity;I Jesoa Kristy, nandritra ny Asa fanompoana nataony tao Galilia, dia nananatra sy nanome toky ny Mpianany sy ireo Mpanaradia izay milaza tena ho mpomba Azy mba hijoro tsara sy ho mendrika izany anarana izay. Nitaona azy ireo hanana fanapahan-kevitra mazava sy mari-pototra manoloana ny zavatra hitranga sy hateraky ny fanarahana Azy ny Tompo. Tena m mahakasika antsikaKristiana rehetra ihany koa izany; ary miantefa manokana ho antsika Sampana Lehilahy Kristiana FJKM amin’izao alahadin’ny SLK sady Vanimpotoanan’ny Andro farany izay hijoroantsika ho Vavolombelon’I Jesoa Kristy eo ambany fitarihan’ny Fanahy Masina izao.
“S.L.K Mankato ny fitarihan’ny Fanahy Masina”
1) Lehilahy manaiky sy manambara an’I Jesoa ho Tompo (and. 8-10) Mazava ny fanambaran’I Jesoa Kristy momba ny fanapahan-kevitra ataon’ny olona rehetrampanara-dia ny Tompo eto. Mitovy ary miankina amin’ ny fanapahan-kevitra nateraky ny safidy atao ary ambaran’ny olona mpomba an’I Jesoa Kristy amin’ny alalan’ny teny,fihetsika eo anatrehan’ny fiaraha- monin’olombelona ny ho fanapahan-kevitra hataon’ny Zanak’olona (Anarana nanambaràn’I Jesoa ny tenany, Ilay Mesia efa nambara fa ho avy haneho ny hery sy voninahitra ary hitsara an’izao tontolo izao Dan. 7, 13) manoloana ny fitsaran’Andriamanitra ho avy. Takian’ny Tompo amin’ny Mpianany mantsy ny hananan’izy ireo fiainana mifanaraka amin’ny maha-Mpianatra: tsy mihatsaravelatsihy, tsy hiteny ratsy ny Fanahin’ny fahamarinana hatahotra sy hanaja an’Andriamanitra izay tompon’ny teny farany amin’ny zavatra rehetra. Ny fanekena an’I Jesoa ho Tompo sy Mpamonjy sy ny fanarahana Azy dia tsy mijanona hosafidy nataon’ny olombelona sy ho an’ny tena fotsiny, tsy ho fanapahan-kevitry ny saina na ho fihetseham-po fa finoana iainana avy amin’ny Fanahin’Andriamanitra ka tsy maintsy hambara sy ampahafantarina amin’ny teny sy ny asa ary ny fitondran-tena, fiaina eo anivon’ny fiaraha-monina. Izany no tena Mpianatra marina sy MpankatoI Joba, ilay lehilahin’Andriamanitra tonga ohatra ny amin’ny faharetana, indrindra ny amin’ny fifikirana amin’ny finoana sy ny fahamarinana araka an’Andriamanitra dia naneho izany toetra maha-Mpankato ny Tompo Andriamaniny na dia nianjadian’ny fitsapana, fanenjehana, fahoriana maro lafy aza. Nanana ny Fanahin’Andriamanitra nitarika azy izy ka nitoetra ho mahatoky teo anatrehan’ Ilay Mpanavotra azy (Job. 19, 26-29). Isika Lehilahy Kristiana izay manara-dia ny Tompo Jesoa ihany koa dia tokony haneho ny maha- kristiana antsika. Hijoro sy hiaina ho tena Lehilahy (Lohan’ny vehivavy sy ny ankohonana, Mpitarika sy tomponandraikitra voalohany eo amin’ny fiaraha-monina) sy hanao sy hitana ny tenin-dehilahy ka hanao Eny; eny mandrakariva amin’ny Sitrapon’Andriamanitra rehetra ary hanaiky sy hankato araka izay hitarihan’ny Fanahy Masina antsika. Araka izany dia andeha isika hifampitaona ka hanao dingana lehibe fiainana kristiana. Ny Voalohany sady lehibe indrindra amin’izany dia ny fandraisana an’I Jesoa Kristy ho Tompo sy Mpamonjy ho an’ny tena sy ny ankohonana ary ho porofo sy hikolokoloana izany fanampahan-kevitra tsara sy azo antoka izany ny fidirana ho Mpikambana ao amin’ny Sampana S.L.KFJKM.
2) Lehilahy Sahy mijoro ho Vavolombelona marina Efa nambaran’ I Jesoa mandrakariva tamin’izay mpanara-dia Azy ireo zavatra hitranga sy ny vokatry ny fanarahany ny Tompo eto an-tany na ho mandrakitray. Anisan’ireny ny fanenjehana, ny fampijaliana, ny fisamborana sy ny fitsarana azy ireo eo anatrehan’ireo Manampahefana sy Tomponandraikitra Jiosy ary ny hafa firenena aza. Manoloana izany; satria efa nanao safidy tsara ny homba an’I Jesoa avy any Nazareta; izy ireo dia nanome toky sy fampanantenana ho azy ireo ny Tompo fa hanome ny Fanahy Masina (Parakleto=Mpampahery, mpanolo-tsaina, Mpisolo-vava) ho eo anilany,ho ao anatiny hanala ny tahotra sy ny ahiahy,handevona ireo endrim-pahalemena rehetra izay mpahazo ny olombelona. Ny Fanahy Masina, izay Tompo sady Mpanome aina, no hampianatra, hananatra, hanome ny teny, ny valiteny mifanaraka amin’ny sitrapon’Andriamanitra sy mifanaraka amin’ny maha-Mpianatr’I Kristy (Vavolombelona marina)azy ireo.I Paoly Apostoly, ilay lehilahy mahery fo teo amin’ny fitoriana ny Filazantsara dia nijoro ho vavolombelona ny amin’ny fanompoana nataony teo amin’ny Jentilisa. Tanteraka izany noho ny Fitarihan’ny fanahy Masina sy ny fahasoavan’Andriamanitra. Amin’ny maha-mpanompon’I Kristy Jesoa azy. Toy izany koa isika Mpino kristiana dia tokony hanana fahatokiana sy fahasahiana amin’ny fitoriana ny Vaovao mahafalin’ny Famonjen’ Andriamanitra, izay tanteraka tao amin’I Jesoa Kristy ary natao ho an’nyolona rehetra. (Rom.15, 14-21). Farany, miantefa ho antsika S.L.K koa izany fampanantenan’ny Tompo antsika eo amin’ny maha-“Lehilahy mahery “ antsika.Araka ny tarigetrantsika hoe” Lehilahy mitombo amin’ny fahatsarana, mitombo amin’ny hamaroana, mirindra amin’ny fomba fiasa”. Ho Lehilahy kristiana tsy mihemotra eo anoloan’ny zava-tsarotra atrehany, tsy mivadika amin’ny teny sy fanekena nataony, Mpankato ny Tompo Andriamanitra Ray sy Zanaka ary Fanahy Masina; vonona sy sahy, mahatoky sy manetry tena tokoa anie isika. Izany mantsy no “Lehilahy Mankato ny Fitarihan’ny Fanahy Masina”; eny izany no Tena Lehilahy Mpianatr’I Kristy marina.Hoy mantsy i RABARY “Ny lehilahy zero, zero ny fahavalony. Ny lehilahy kely, kely nyfahavalony. Ny lehilahy lehibe, lehibe ny fahavalony”. Ry Lehilahy Kristiana sy izay rehetra Mpikambana ato amin’ny S.L.K Ô! MIJOROA! “Fa tsy nomen’Andriamanitra fanahin’ny fahosana isika fa fanahin’ny hery sy ny fitiavana ary ny fanoloran-tena; Koa aza menatra ny ho vavolombelon’ny Tompontsika ianao…Ry Lehilahy mahery!” (IITim.1, 8a; Mpits. 6, 12b) Homba ny fanahinao anie ny Tompo! Ho aminareo anie ny fahasoavana Ho an’Andriamanitra irery ny voninahitra!
RAMANANTSALAMA Lovasoa Hasina, Mpitandrina Mpitantsoratry ny SLK FJKM