Alarobia 20 Novambra 2019.
Fandalinana ny Boky JEREMIA
Jeremia 39.1-18
Tapitra ny indrafon’ Andriamanitra tamin’i Joda.
1-Voasambotra ny mpanjaka Zedekia
Natao fahirano ny tanàna ary niafara tamin’ny fitsofohan’ny fahavalo tao izany . Nilefa ny mpanjaka nefa voasambotra ihany . Nopotsirin’ny mpanjakan’i Babylona ny masony ary novonoina ny zanany sy ireo manan-kaja teo amin’ny Jiosy . Ianao , tandremo fa ho avy tahaka ny mpangalatra koa ny andron’ny Tompo , ary hamaly ny ratsy fanahy sy ny tsy mino Azy Izy.
2-Nodorana ny tanàna :
Faminanian’i Jeremia izany ary nanenjehana azy . Rava ilay fanantenana hoe: Jerosalema tsy horavana satria misy ny tempolin’i Jehovah! (7.4). Tandremo fa tempolin’ny Fanahy masina ianao , ka rehefa manimba ny tempoliny ianao dia mba hosimbany koa (1 Kor 3.17).
3-Nentina ho babo ny vahoaka :
Ny fanekena nifanaovan’i Jehovah sy Israely dia ny hitoerany ao amin’ilay tany tondra-dronono sy tantely , nefa mila mitandrina ny lalàna ireo . Miala ao kosa izy rehefa tsy mitandrina izany. Tanteraka izany eto fa ho babo any Babylona izy ireo . Ianao kosa , katsaho izay hahafahanao miaina ao amin’ilay Jereosalema vaovao . Fadio izay mety ho sakana (Apo 20.8).
« Raiso ny Tenin’ Andriamanitra » Boky faha-6