Talata 19 Novambra 2019.

Fandalinana ny Boky JEREMIA

Jeremia 38.14-28

Tahotra roa samihafa:

1-Matahotra an’ Andriamanitra i Jeremia:

Ny tahotra an’ Andriamanitra no manery an’i Jeremia tsy maintsy hilaza izay rehetra naseho taminy fa ho tanteraka eo amin’ny tanin’ny Joda sy ny mponina ao Jerosalema . Efa tena nitondrany ny mangidy izany , ary mahatonga ny mpiara-belona aminy hankahala azy . Tanteraka aminy mihitsy ilay tenin’i Jesoa hoe: « Ho halan’ny olona rehetra ianareo noho ny Anarako » (Mar 13.13) . Tsy nampaninona azy izany , fa ny tahotra an’ Andriamanitra dia toky lehibe ho azy eo am-panaovana ny asany . Ary ianao?

2-Matahotra ny olona i Zedekia mpanjaka

Antokon’olona telo no atahorany dia ny Babyloniana, ny mpanapaka ary ireo vahoaka efa lasa babo mialoha tany Babylona. Na dia atoron’i Jeremia azy mazava aza ny làlana hahavelomany dia tsy sahy nanatanteraka izany izy noho ny tahotra . Ho marina aminy indray ilay teny hoe:  » ho voaozona izay olona matoky olona sy manao ny nofo ho sandriny , ka miala amin’i Jehovah ny fony  » (Jer 17.5).

« Raiso ny Tenin’ Andriamanitra » Boky faha-6