Talata 01 Oktobra 2019.
Fandalinana ny Boky SALAMO
Salamo 49
Mitodika amin’ny firenen-drehetra ny Fanahin’ Andriamanitra amin’ny alalan’ny mpanao salamo , na toa inona na toa inona laharany eo amin’ny fiaraha-monina (and2,3) .
Ny haben’ny harena eo ampelatànana tsy mahavotra ny aina « fa lafo ny takalon’ny aina ka tsy takatra mandrakizay » (49.8,9) . Tsy misy na inona na inona azo atao raha mby amin’ny andro hahafatesana . Zava-poana , tsy misy azo hanankinana ny fo na ny harena na ny voninahitra eto amin’izao tontolo izao .Araka ny voalazan’ny Jak 4.6 hoe : « Fa Andriamanitra manohitra ny mpiavonavona … »
Toy izany koa no ambara mahakasika ny laza amam-boninahitra . Mandalo sy mihelina toy ny akofa izany (and12). Ary izay olona manana voninahitra nefa tsy manan-tsaina dia tahaka ny biby izay samy tsy maintsy ho faty (Sal49.20) . Ny olona mahitsy ihany no hahazo ny lova maharitra mandrakizay . Teny fampieritreretana izany manoloana ny harena sy ny voninahitra izay mandalo ihany eto an-tany .
« Raiso ny Tenin’ Andriamanitra » Boky faha-7