Alakamisy 19 Sept 2019.
Fandalinana ny Boky 2 KORINTIANA
2 Korintiana 11.16-33
Maro ireo fijaliana iaretan’ny mpanompon’ Andriamanitra . Ny mahagaga , na dia toa mafy sy tsy ahitana vahaolana aza izany , dia mivoaka ho mpandresy hatrany . Manana fiainana mahagaga ny mpanompon’ny Tompo .
1-Toa heverin’ny olona ho adala (and16-18)
Ny mpanompon’ Andriamanitra dia lazain’ny sasany fa very saina sy milaza zavatra tsy hisy mandrakizay , mpanadala saim-bahoaka , hoy ny sasany . Satria , nahoana? « Fa ny teny ny amin’ny hazo fijaliana dia fahadalana amin’izay ho very , fa herin’ Andriamanitra kosa amintsika izay hovonjena » (1 Kor 1.18). « … ka dia ny fahadalan’ny fitorianteny no sitrak’ Andriamanitra hamonjeny izay mino » (1Kor 1.21)
2-Toa misedra fahafatesana matetika (and21-29)
Mandalo zava-tsarotra , manakaiky fahafatesana isanandro ny mpanompon’ny Tompo . Eken’ny mpanompon’ Andriamanitra izany , tsy noho ny sitrapony anefa , fa noho ny sitrapon’ilay Andriamanitra naniraka azy tahaka an’i Jesoa (Lio 22.44/ 2Kor 4.8-18) . Ao amin’i Kristy ny fanantenany ka mandresy izy . Miaina ny toy izany isanandro ianao nefa matokia fa Ilay Tomponao efa nandresy izany ka mandresy koa ianao izay ao Aminy .
3-Andriamanitra irery ihany no mahalala ny fahamarinan’ny mpanompon’ Andriamanitra (and31)
I Paoly dia nanankina ny momba azy tamin’ny Tompo . Manaova toy izany koa ianao , fa Izy handamina ny làlanao (Ohab 3.5-6/ Isa 50.8) . « Iza no hiampanga ny olom-boafidin’ Andriamanitra ? Andriamanitra no manamarina azy » (Rom8.33).
« Raiso ny Tenin’ Andriamanitra » Boky faha-8