Alarobia 17 Jolay 2019.

Fandalinana ny Boky ROMANA

Romana 6.1-14

Hoy ny and 1-2 : « inona àry no holazaintsika ? Mbola hitoetra amin’ny ota ihany va isika hitomboan’ny fahasoavana? Sanatria izany ! « 

1-Tsy mpanompon’ ny fahotana intsony isika satria efa namono azy niaraka tamin’i Jesoa Kristy .

Nandresy sy namono ny fahotana no anisan’ny antony nahafatesan’i Jesoa Kristy . Ary rehefa nino an’i Jesoa isika ka natao batisa , dia tsy i Jesoa irery no maty , fa isika koa miombona amin’ny fahafatesany (and 1-4,6-7) . Araka izany , tsy manompo ny fahotana intsony isika satria efa hamono azy. Koa satria efa novonoina ny fahotana , dia tsy manana fahefana hampanompo antsika intsony izy.

2-Velona ho an’ Andriamanitra ao amin’i Jesoa Kristy isika satria efa novelominy niaraka taminy .

Mifampiankina ny fahafatesana sy ny fahavelomana ao amin’i Jesoa Kristy . Rehefa maty noho ny ota niaraka taminy isika , dia tsy maintsy mitsangana velona miaraka Aminy koa. Tsy misy an’izany hoe : maty fotsiny nefa tsy velona avy eo raha toa ka tena maty niaraka taminy . Hoy ny and 4 « Koa niara-nalevina taminy tamin’ny batisa ho amin’ny fahafatesana isika , mba ho tahaka ny nananganana an’i Kristy tamn’ny maty tamin’ny voninahitry ny Ray no handehanantsika kosa amin’ny fiainam-baovao » .

« Raiso ny Tenin’ Andriamanitra » Boky faha-8