Alakamisy 06 Jiona 2019.
Fandalinana ny ASAN’NY APOSTOLY
Asan’ny Apostoly 13.1-12
Fanontaniana roa no omena antsika eto
1-Mbola mahay mihaino ny Fanahy Masina va isika ?
Hitantsika eto fa ny Fanahy Masina no nampanokana an’i Barnabasy sy i Saoly (and2), naniraka azy ireo (and4) ary nanome fahasahiana masina azy (and9). Tena i Jesoa ao amin’ny Asa 1.8 izao . Tamin’ny fomba ahoana no nandrenesan’ny Fiangonana voalohany izany feon’ny Fanahy Masina izany . Tao anaty fifadiankanina , izany hoe : tao anatin’ny filomana amam-bavaka. Moa tsy heverin’ny sasany amintsika ho fomban’ny sekta ny mifady hanina ? Diso isika raha izany !
2-Manao ahoana ny anjara toeran’ny vavaka mialoha ny fanokanana sy fanirahana mpanompon’ Andriamanitra?
Nialohan’ny hanirahana azy roa lahy dia nifady hanina sy nivavaka ny Fiangonana . Moa tsy fieritreritra izany mialohan’ny hanokanana Mpitandrina sy Mpiandry ary Diakona sy Loholona ? Ady mafy no hatrehin’izy ireo . Hifanandrina amin’ny mpanao ody izy ireo . Koa tena nilainy izany vavaka nanovozana herim-panahy izany . Tsy miova mandraka ankehitriny ny hamafy sy hasarotry ny asan’ny mpitory ny Filazantsara . Anjarantsika ny mianatra izay nataon’ny Apostoly .
« Raiso ny Tenin’ Andriamanitra » Boky faha-8