Alatsinainy 22 Apriy 2019.

Fandalinana ny Filazantsara araka an’i MARKA

Marka 16.9-20

Vehivavy izay ambara ho fanaka malemy, natao anjorombala teo amin’ny fiaraha-monina Jiosy , sady demoniaka « Maria Magdalena, ilay namoahany demonia fito » no nisehoan’i Jesoa voalohany raha vao nitsangana tamin’ny maty Izy , ary nirahiny hampita izany

Tsy ny lehilahy na ny olona marina sy tsara ihany izany no fitaovana sy fiasam-pamonjena ary iraka fa na dia ireo heverina ho tena mpanota aza . Samy nirahiny :  » Mandehana any amin’izao tontolo izao ianareo ka mitoria ny Filazantsara amin’ny olombelona rehetra » na ny lehilahy na ny vehivavy na ireo mihevi-tena ho marina, na ireo heverin’ny mpiara-monina ho mpanota koa aza.

Te-hitaona ahy sy ianao ny Soratra masina eto fa tsy mifidy sokajin’olona hirahina hanambara ny vaovao mahafaly i Jesoa Kristy, ny finoana ihany no fepetra takiny ka : « Izay mino sy atao batisa no hovonjena , fa izay tsy mety mino no hohelohina » . Raha mino an’i Jesoa Kristy ny olona iray dia manolo-tena, ka hahavita asa mahagaga , famahana ny olan’ny hafa, fanasitranana izay tsy takatry ny saina aza (and17-18). Miantefa amnao ny antson’ i Jesoa Kristy anio handray ny famonjena sy hamaha ny hetahetan’ny mila vonjy raha mino Azy ianao.

« Raiso ny Tenin’ Andriamanitra » Boky faha- 6