Sabotsy 20 Aprily 2019.
Fandalinana ny Filazantsara araka an’i MARKA
Marka 14.32-54
Mampianatra sy mitaona antsika i Jesoa Kristy eto fa na dia Izy aza tsy mandeha araka ny heriny , ny fahalalany , ny sainy sy izay tiany ho natao fa nahay nametraka ny zava-manjo Azy tamin’ Andriamanitra Rainy : « Aba ,Raiko ô, ny zavatra rehetra hainao, esory amiko ity kapoaka ity , nefa aoka tsy ny sitrapoko anie no hatao fa ny Anao. »
Inefatra miverina eto ny teny iray tarika amin’ny hoe : vavaka , izay midika ho fametrahana sy fiankinana feno amin’Andriamanitra , fanekena ny sitrapony . I Jesoa hatrany no manatanteraka izany eto: maneho Izy ny maha- modely , fitaratra Azy na amin’ny faharetana , na main’ny fiaretana na amin’ny fahafoizam-potoana , na ny fihetsika . Manaporofo izany ireto teny ireto: »Mipetraha eto ianareo mandra-pivavako… niankohoka tamin’ny tany ka nivavaka » . Noho izany, fianteherany sy fiankinany tamin’Andriamanitra Rainy izany , na dia sarotra aza ny miandry Azy , na dia mafy aza ny hanjo azy dia tsy nahakivy , na nahaketraka , na nampiraviravy tànana Azy izany . Mitaona antsika izany hahay hametraka ny adintsika , ny fanahiantsika , ny tahotsika an’ Andriamanitra , ilay azo antoka fa tsy handao antsika na oviana na oviana .
« Raiso ny Tenin’ Andriamanitra » Boky faha- 6