Sabotsy 16 Martsa 2019.
Fandalinana ny Boky 1 Mpanjaka
1 Mpanjaka 13.1-13
Mahavelona fatratra ity tantara ity
1-Tsy sasatra mampiteny amim-pahasahiana ny Tompo .
Naniraka mpaminany hiteny sy hanao fahagagana hampino an’i Jeroboama ka hamerina azy amin’ny làla-marina ny Tompo. Ny fahagagana nampitresaka ny alitara sy ny nahamaina ny tànan’i Jeroboama dia samy porofo tsy azo lavina ny maha- mpaminany marina ity lehilahy niteny ity . Ary fitiavan’ny Tompo an’i Jeroboama izany , fitiavana azy toy ny mbola nanekeny hihaino ny fifonan’ilay mpaminany ho azy ka nahasitrana indray ny tànany . Izany no famindrampon’ Andriamanitra amintsika mpanota maditra sy mafy fo ka mbola nanomezany antsika an’i Jesoa zanany .
2-Sahirana amin’ny fankatoavana ny Tenin’ny Tompo ilay mpaminany .
Ny teny marina azony dia izao: aza mihinana! Nanasa azy ny mpanjaka fa nandà izy. Izany hoe: mbola nahajoro izy. Fampitandremana lehibe ho antsika izany : na olona mitonona ho mpanompon’ Andriamanitra izao aza no nampanao anao zavatra mifanohitra amin’ny sitrapon’ Andriamanitra dia hampahafantariny anao : aza manao! « Miorena tsara , aza miova » (1 Kor 15.58).
« Raiso ny Tenin’ Andriamanitra » Boky faha- 3