Talata 12 Martsa 2019.
Fandalinana ny Boky 1 Mpanjaka
1 Mpanjaka 11.14-25
Tezitra ny Tompo . Inona àry no hataony ?
1- Nanapa-kevitra hanala ny fanjakana amin’i Solomona Izy (1Mpanj 11.1-13). Ny teny izay novakintsika omaly no efa nahitantsika izany . Ary lesona makadiry ho an’ny mpitondra fanjakana izany . Fa Andriamanitra no Tompon’ny fahefana . Fahefana ampindraminy eo an-tànan’ny mpitondra. Raha tsy mifanaraka amin’ny hevitr’izy tompony ny ampiasana izany fahefana izany , dia azony esorina izany .
2-Nanangana fahavalo hiady amin’i Solomona Izy .
Nitsangana ho fahavalon’ Andriamanitra tamin’ny nanotany i Solomona ary nanangana fahavalo hiady aminy kosa Andriamanitra . Ny fahavalo hitantsika eto dia ireo izay efa niotrika ela tamin’ny andron’i Davida rainy , saingy tsy afa- nikofoka satria mahery i Davida. Izao kosa , nipongatra daholo indray ireo ka tonga loza ho an’i Solomona sy ny fanjakany . Ny Oha 16.7 dia milaza hoe: « Raha sitrak’i Jehovah ny alehan’ny olona , na dia ny fahavalony aza dia hampihavaniny aminy » , fa ny hitantsika eto kosa dia izao : rehefa tsy sitrak’i Jehovah ny alehan’ny olona , na dia ny fahavalo efa lefy aza omeny hery vao indray , ary tena zava-doza izany satria Izy Andriamanitra mihitsy no mifanandrina amin’i Solomona izao .
« Raiso ny Tenin’ Andriamanitra » Boky faha- 3