Sabotsy 09 Febroary 2019.
Fandalinana ny Boky 2 Samoela
2 Samoela 22.31-51
Mamarana ilay salamo nataon’i Davida isika eto:
1-Etsy andaniny :
Andriamanitra manome fitaovana ho azy . Mariho fa ny Tompo no mampakinga ny tongony (and34), mampianatra ny tànany (and35), manome ampinga azy (and36), manalalaka ny làlany (and37). Avy amin’ny Tompo avokoa izay rehetra ho entiny miady , hany ka marina tanteraka fa manao famonjen-dehibe ho azy ny Tompo (and51) ary derainy fatratra (and50). Tsy misy antony tokony hiderantsika tena raha maharesy isika , satria ny Tompo no loharanon’izany .
2-Etsy ankilany : miady amim-pahavitrihana izy .
Ny fampitaovan’ny Tompo dia tsy midika mihitsy akory hoe: hiandry fotsiny izy . Tsia ! Tena manao ny ainy tsy ho zavatra izy : »manenjika ny fahavaloko aho ka mandripaka azy , ary tsy mba miverina aho mandra-pahalany ritrany » (and38) . Tsy maintsy tsarovantsika tokoa manko fa misy ny anjaran’ny Tompo , fa misy koa ny anjarantsika . Raha miezaka samirery isika dia ho resy satria tsy manana ny ho enti-miady koa anefa isika , kanefa mipetra-potsiny dia mbola ho resy ihany . Fa tsy maintsy mivonona hiady ny ady tsaran’ny finoana , hitomban-dahy amin’y maha- miaramila tsaran’i Kristy Jesoa antsika mba ho voninahitry ny Anarany .
« Raiso ny Tenin’ Andriamanitra« Boky faha-3