Alakamisy 18 Oktobra 2018.
Fandalinana ny Bokin’i Josoa
JOSOA 21.43-45;22.1-8
1-Mahatoky tanteraka ny Tompo
Fehiteny maharavo ny fo no hitantsika eo amin’ny and 43-45: nianiana ny Tompo ary notanterahiny izany , fa tsy nohadinoiny akory . Nomeny ny Zanak’ Israely ny tany nampanantenainy ary nomeny fitsaharana tamin’ny nandreseny ny fahavalony izy ireo . « Tsy nisy latsaka na dia kely akory aza ny zava-tsoa rehetra izay nolazain’i Jehovah tamin’ny taranak ‘Israely, fa tanteraka avokoa izany rehetra izany » (and45). Aiza indray isika no hahita Andriamanitra mahatoky mihoatra noho izany ? Ary ao amin’i Jesoa no nahatanterahany izany (2 Ko 1.20); tsarovantsika manokana amin’ny andro krismasy.
2-Misaraka amim-pihavanana
Hitantsika ao amin’ny Nomery 32 ny nahazoan’ny firenen’i Robena sy Gada ary ny atsasaky ny firenen’i Manase zara tany tao an-dafy atsinanan’i Jordana .Ankehitriny , tanteraka ny nifanarahana dia notsofin’i Josoa rano hody izy ireo . Tena toetra mahatoky koa izany mitana ny teny nomena izany , na teo amin’ireo firenena ireo , na teo amin’i Josoa . Ary dia nisaraka tamin-tsodrano izy ireo fa tsy nisy disadisa. Lesona ny amin’ny fitandroam-pihavanana izao.
Ho an’ Andriamanitra irery ny Voninahitra
« Raiso ny Tenin’ Andriamanitra » Boky faha- 2