Hafatry ny Filoha / Sept 2018.
VONTOSY FILAZANTSARA
NY NOSY MADAGASIKARA !
Fa raha ny zava-misy mantsy,
Misy olona famantsy,
Fetsy ratsy lozan-tany
Any ananonanona any,
Ary maro ireny, indrisy,
Eny, maro fa tsy vitsy:
Mirangorango fahefana,
Hahafahana mitana
Toerana avo ireharehana
Sy hanaovana hadalana,
Hanangonana harena
Amin’ny fomba mahonena,
Ambotriana firenena.
Ka tsy misy izay jerena,
Na fihavanana, na rariny,
Fa ny vola sy ny tariny
No hany zava-misy lanjany.
Ary dia ahanjahanjany
Sy tsy mahamenatra azy,
Tsy atahorany izay sazy,
Ny fanaovana an’izany.
Dia ny vokany, jereo:
Ny firenena, mitoreo!
Ka raha tiana ny ho afaka
Tena hiala avy ao an-davaka:
Mila olona mivavaka!
VONTOSY FILAZANTSARA
NY NOSY MADAGASIKARA!
IRAKO Andriamahazosoa AMMI , Mpitandrina
Filohan’ny FJKM