AFIFAB / Herinandro
TATITRA FANOKAFANA NY
HERINANDRON’NY FIFANDRAISANA
Nosokafana omaly Talata 20 Martsa ny Herinandron’ny Asa Fifandraisana sy Fampahalalambaovao ( AFIFAB) 2018 tamin’ny alalan’ny varavarana misokatra izay atao ao amin’ny FOIBE FJKM , Varavarana faha-201 ary azon’ny rehetra tsidihana .
Ny solotenan’ny BMF , ny Mpitandrina Andriamampianina Zaka no nanokatra izany Herinandron’ny AFIFAB izany , izay nialohavan’ny Fanompoampivavahana notarihan’ny Filohan’ny Komitin’ny AFIFAB , ny Mpitandrina Rafanonerantsoa Valisoa .Tonga nanome voninahitra ny fotoam-panokafana koa ny Sekretera Jeneraly sy ny Tonian’ny Departemantan’ny Sekoly .
Ny nampiavaka ity fampirantiana 2018 ity dia ny fandraisana anjaran’ireo mpisehatra AFIFAB any amin’ny SP sy Fitandremana manodidina notarihan’ireo « Andiany Santatra Fahazavana » , mpiofana momba ny seraseram-pifandraisana , navoakan’ny AFIFAB FOIBE ny taona 2017.
Na dia tsy mbola nahenika ny fiangonana aza ny fisian’ ny sehatra asa Fifandraisana dia mahavelombolo ny mahita sy mahafantatra fa tsy zavatra kely amin’ny fiangonana ny fampitana ny vaovao mahafaly amin’ny alalan’ny soratra sy ny sary ary ny feo , ary dia miroborobo tokoa izany amin’ireo fiangonana efa mampiasa izany .
Ny fampirantiana dia haharitra hatramin’ny Zoma 23 Martsa 2018 maraina . Ny Alahady 25 Martsa 2018 tolakandro kosa dia hisy ny RINDRA GASY izay hanasana ny kristiana rehetra ho tonga ao amin’ny FJKM Andravoahangy Fivavahana , manomboka amin’ny 3ora sy sasany tolakandro .
Alao hery àry ry havana ,mandehana raha mbola manana ny mazava ianao , fa ho avy ny alina ka tsy afa-miasa intsony ny olona (Jao 9.4). Mifampilazà , tongava maro .
Sahondramalala Vololona