Alarobia 22 Febroary 2017

VAVOLOMBELON’NY FANEKENY NY TOMPO

 1 TIMOTY 6.11-16

Miadia ny ady tsaran’ny finoana

Manana  ady isanandro  isika kristiana . Miseho  amin’ny endrika  maro samihafa  izany ka tokony  ho malina isika . Anisan’izany ny ady amin’ny fampianaran-diso  izay antsoiny hoe : « fanahy mamitaka sy fampianaran’ny demonia » (1 Timoty 4.1) sy ny fandriky ny fitiavan-karena tafahoatra (and3-10). Inona  àry  no tokony hatao manoloana izany ?

1-Mandosira (and11)

Ny hoe : « mandositra » dia manalavitra . Halaviro ny fanarahana fampianarana hafa izay tsy manaiky ny teny tsy misy kilema nambaran’i Jesoa  Kristy . Manohitra  ny fivavahantsika ireny ka mahatonga fieboeboana sy fiadian-kevitra , fialonana, fifandirana, fanevatevana… »(and3-4 DIEM) . Halaviro ny fitiavana  harena tafahoatra. Ny fitiavambola no fototry ny ratsy rehetra . Ny olona sasany fatra-pitady izany dia efa tafavily niala tamin’ny finoana (and10). Mahaiza mianina  amin’izay ananana .

2-Mitandrema mba  tsy hanan-tsiny (and14)

Izany no filamatra  tsy maintsy  hanorenan’i Timoty  ny asa fanompoany mandra-piavin’ny Tompo. Ady sarotra  izany raha  amin’ny maha- olombelona fotsiny amin’izao , nefa azo antoka  fa raha mandray an’i Jesoa ho ao am-po isika dia hitoetra  ho tsy manan-tsiny  eo anatrehan’ Andriamanitra  amin’ny andro ihaviany indray .

Fanontaniana :

Tsy tokony hanan-karena ve izany ny kristiana ?

Birao  Sekoly  Alahady  FOIBE  FJKM