Talata 21 Febroary 2017
VAVOLOMBELON’NY FANEKENY NY TOMPO
2 SAMOELA 7.25-29
Ny vavaky ny mpanjaka
Nanome fampanantenana ho an’i Davida mpanjaka ny Tompo fa hitahy azy sy hahalehibe ny anarany. Izany no nanetsika ny fon’ny mpanjaka hanandratra vavaka . Misy fizarana roa ilay vavaka , ka ao anatin’ny fizarana faharoa (and22-29) no hitantsika eto .
1-Apetraka eo anatrehan’ny Tompo ny fitondrana
Hoy ny and 25 : « Ankehitriny ry Tompo Andriamanitra ô ny fampanantenana nolazainao momba ahy sy ny taranako dia tano mandrakizay ary ataovy araka izay efa nampanantenainao « (DIEM). Ekeny fa Andriamanitra no efa nifidy ny vahoakan’Israely . Izy no nametraka an’i Davida ho eo amin’ny seza fiandrianana maha-mpanjaka . Izay rehetra manana fahefana sy mipetraka eo amin’ny toeran’ny mpitondra dia tokony hanetry tena sy hahatsiaro fa Andriamanitra no nanendry azy . »Fa tsy misy fahefana afa-tsy izay avy amin’ Andriamanitra , fa izay misy dia voatendrin’ Andriamanitra » (Rom 13.1).
2-Mivavaka ho an’ny taranany
Hoy ny and 29 : « …dia aoka ho sitrakao ny hitahy ny taranaky ny mpanomponao haharitra mandrakizay eo anatrehanao… ». Aoka hametraka ny ho avin’ ny taranaka eo ampelatànan’ny Tompo isika . Adidintsika ny mivavaka sy mitaona azy ireo hanara-dia an’i Jesoa .
Fanontaniana :
Nahona no misy kristiana tsy mahataona ny ankohonany hivavaka ?
Birao Sekoly Alahady FOIBE FJKM