Alarobia 18 Janoary 2017
Vavolombelona mahatoky ny Tompo
Hebreo 13.7-16
Mitondrà tena amin’ny maha- mpino kristiana
Inona avy no atao amin’izany ?
1-Tahafo ny finoan’izay nitarika antsika :
Izany no toetra ampitain’ny and 8: »Tsarovy ny mpitondra anareo … ka araho ny finoany « . Maro amin’ny mpitory ny Filazantsara no nanome ohatra tsara amin’ny finoana . Aoka tsy ho toetrany ivelany no hotahafina fa ny finoany . Ianaro ny fiainan’ireo zoky am-pinoana, mpitarika , tsara laza tamin’ny finoany. Ny handraisana lesona avy amin’ny fiainan’izy ireny no kendren’ny Epistily ho an’ny Hebreo ka hitanisany ny finoan’i Abrahama , i Isaka, i Mosesy sy ny maro hafa(toko11) .
2-Miorena amin’ny finoana noraisintsika
Mitaona antsika hifantoka amin’ilay tsy miova ny and8-9 sady mampitandrina antsika amin’ny fampianarana manaitaitra . Miorena amin’ny finoana marina fa tsy manaitaitra . Miorena amin’ny finoana marina fa tsy amin’ny fombampombam-pivavahana indrindra ny sakafo izay fady amin’ny hafa nefa azo hanina ho an’ny sasany . Tsy fombafomba no hamonjena antsika fa fahasoavana .
3-Manolora sy manomeza ho mariky ny fitiavana
« Aza manadino hanao soa fa izany no fanatitra ankasitrahan’ Andriamanitra ( and16) . Tsy mba manao fanatitra tahaka ny Jiosy ny kristiana. Fanatitra hafa no asaina ataony dia ny fiantrana , fanomezana sy fanolorana ho an’ny tsy manana. Mariky ny fitiavana izany , sady famonjena ny hafa toy izay nataon’i Jesoa .
Fanontaniana:
Moa misy toetra na fitondrantena hafa mbola hitanao ao amin’ity perikopa mofonaina ity ? Lazao !
Birao Sekoly Alahady FOIBE FJKM